Setu ni erruet e Kastell-Nevez ar Faou, ur gumun tamolodet war ribl ar stêr Aon, un endro peurvat, sioul, glasvezus. Emañ ur gobar o verdeiñ war ar c’hanol, a-us dezhañ emañ chapel Itron-Varia ar Porzhoù. Gellet a reomp gwelet sklaer Kastell Trevare n’emañ nemet un nebeud munutennoù ac’hano. Neuze, e kreiz ar glasvez e teu d’hon diskouarn sonennoù ha luskoù drant ha dizoleiñ a reomp a-hed an dour pabelloù, dañserien hag arzourien diroll !
Programm en dorn, kuit deomp da c’hwitañ war an disterañ tra eus an dibenn-sizhunvezh digredus-mañ en em leuskomp laouen da vezañ c’hwezhet gant ur wir darzhadenn sonerezh ! Un aergelc’h fest a zo o ren, gwall zisheñvel diouzh ar pezh a c’heller gortoz eus ur festival jazz hengounel. An eur zo d’ar swing, d’ar jazz giz New Orleans ha d’an holl dud n’int ket evit chom hep dañsal. Riboulat a reomp eus un eil leurenn d’eben ha da n’eus forzh pelec’h ez eomp emañ ar sonerezh ganeomp. Ne baouezomp ket da vezañ souezhet gant an endro a-ziwar ar maez, kinklet en un doare dibar ha livet-kaer. Profitañ a reomp eus ur saloñs mod kozh, hon treid war ar geot, e skeud un halegenn hag ur vunutenn war-lerc’h emaomp o tañsal gant an engroez war tonioù steredennoù brasañ jazz ar bed-mañ.
Leizh a zizoloadennoù a reomp rak lakaet e vez en a-raok sonerien ha strolladoù yaouank evel Agathe Iracema pe c’hoazh an Amerikaned Frog & Henry. Eus pevar c’horn ar bed e teu an arzourien betek ar Fest Jazz : Stadoù-Unanet Amerika, Sveden, Brazil, Bro-Saoz ha kement a vroioù all. Dont a reont ha degas da Greiz Breizh o swing hag o startijenn sebezus. Da bep oad hag eus pep lec’h ivez e teu an arvesterien. En em gavout a reomp soubet en ur mor a sevenadurioù e kreiz an dañserien, ar festivalourien hag ar bern traoù ouzhpenn a vez kinniget war al lec’h. Diskouezadegoù livadurioù, arzourien janglerien, festival Off e kreiz-kêr ha sonadegoù e Kastell kaer-meurbet Trevare... Ne c’hellimp ket ober pep tra met ne vo ket anv da gavout hir hon amzer, a dra sur. A-benn ar fin ez eomp kuit birvidikaet, drant, eñvorennoù dispar leun hor pennoù ha gant ar santadur da vezañ bevet ur pennad-buhez eus ar re jazziañ...